Epan 2
1. Yọ ísúbù ọtẹtaro, bi yaá fọ ówiya Ẹ́kana, Ẹ́galilì ẹkà, ká Ijésu wiya wó ẹ̀fẹ̀nẹ́bẹ́:
2. Bì yèe ká Ijésu akà Yọ égbén-ùrùn-ẹkà yọ ówiya-ọ̀fọ̀fọ àyẹ
3. Ọgbọ̀na ádẹ́ kwe nà, Ijésu wiya gane Yà ka, be me pile sú ádẹ́ go.
4. Ijésu gánẹ́ yà ka, Íyaarò, ẹ̀na àtikàwọ tì sú bile a? Mọ ọgbà éè mí re go
5. Wíya gánẹ́ ẹ̀nanẹ e rùwa ijen na ka, Ẹ̀kẹ̀na ẹ̀kẹ̀na Àa ga ne nọ̀ na, ni siy-ẹ.
6. Ọtare-ọ́kọ̀nọ ọpọ́nọọ́rẹ nẹnẹ díya nà ébí upiri ẹ̀bὸrè tàbi ẹ̀ta na wó ẹ̀fẹ̀nẹ́bẹ́, àkọ Íjúù àbe siye e siye na.
7. Ijésu gánẹ́ bà ka, Ni yin ébí fè ọ̀tele àbe. Bí yin ébí fè bá kẹ̀mkẹ̀m.
8. Á cá a gánẹ́ bà ka, Ni kùrù àmọ jen a nẹ ẹ̀fẹ̀na fọ ayen tà éjemẹ àyẹ na. Bí kùrù ya jen an nẹ ya.
9. Ọgbọ̀na ẹ̀fẹ̀na éjemẹ àyẹ dọ̀n-úba na tọrẹ ya na, àyẹ e me din ẹ̀fẹ̀na è wé cà na (àma ẹ̀nanẹ e siye ògúbá na din;) e yè ówiya-wẹda.
10. E cin ya ka óro dà táyì rùwa adẹ nẹnẹ rọnmuro na, ọgbọ̀na éró e-mi fè ke na, cana e dè mi fọ̀ ọ̀nẹkọ́nẹ e-mi kù na we ca; àma awọ fọ ọ̀nẹnẹ rọ́nmuro na su re òmúnúrùn.
11. Òjinorówófùwà òcóro nẹnẹ Ijésu siye ọ̀nẹ na fọ̀ yọ̀ọ ugbugbodi yẹ̀n; Yọ égbén-ùrùn-ẹkà àbẹ nẹ̀-Ẹ́wọ̀.
12. ¶ Ọgbọ̀na bì siye ke na, A yọ̀ Ẹ́kàpànámù, káyẹ, ká wiya akà Yọ égbén-ùrùn-ẹkà: àma bi mà ma ẹ̀fẹ̀nẹ́bẹ́ fónmọrẹ.
13. ¶Ácá na, Íjú bọ òfùruẹ́pan-cun ímù-ọ́gbà re, Ijésu yọ Íjèrúsálẹ́mù,
14 Á gbá ẹ̀nẹnẹ a jọ ọ́na akà údúdò akà ìlékúkù, akà ẹ̀nanẹ e bìlà íkíba na, bẹ̀ ma:
15. É tiye óyi, E è siye onìnì, É gù bá fẹyan wó ẹtẹmpilì weca: ká údúdò akà ọ́na akà ẹ̀nanẹ a jọ ba na, E gù ba gùmà wó ọyẹn, É bìlà bá àdan ẹpan-walẹ.
16. Á ganẹ ẹ̀nanẹ a jọ ìlékúkù na ka Nẹ kọ ẹ́pẹ́n ẹ̀nanẹ wéyọ̀; ní má sẹ Tẹda uùboo cinà ẹ̀fà òsiye ùbèlè.
17. Yọ égbén-ùrùn-ẹkà cá yẹn ka be wọ̀rẹ wo ije ka, Ọ̀yàyà nẹ wó ubowò na fọ̀ọ mọ siye ijen je.
18. ¶Íjurò ca cin ya ka, Ẹ̀yẹ̀nkẹ ọ̀ọ́na wà á ka mà yẹn tọ a, àkọ Ù siye siye e nè ẹ̀nanẹ na?
19. Ijésu gunowo, á ganẹ bà ka Ni kpukpuse ẹtẹmpilì ọ̀nẹ, n-aáka gbà ka y-ìisubù ọ́tẹtaro, m-aáka fwẹ fura ijè.
20. Íjurò àbẹ ganẹ yà ka, Ẹyẹn ííbọ̀rẹ̀-ka-etùpọnọ̀ọ́rẹ àyẹ bìya mẹ ẹtẹmpilì ọ̀nẹ; àwọ ùka wàa ka fwẹ jọ́wọn ísubù ẹ̀ta a?
21. Àma Y- iíwukpe ẹẹ̀tẹmpilì àyẹ À-ágá.
22. Ọgbọ̀na è mi palẹca fura éèkporo na, Yọ égbén-ùrùn-ẹkà yẹn ẹ̀kẹ̀na à gá n-ẹ̀bà na, cana be nà Íbíbelì akà Ijésu ẹgà nẹnẹ à gá na wọ.
23. ¶Ọgbọ̀na e wó òfùruẹ́pan-cun ímù Íjèrúsálẹ́mù na, éró ọyọyọ nà Y-ìíwúrù wọ, ọgbọ̀na bẹ̀ gbá útún-òjinorówófùwà nẹnẹ è siye na.
24. Àma Ijésu emè téyí Y-ìíwú wo ba ijè, úbaaka, è din éró fẹyan.
25. Ama karẹ ka óró a ga órọ́bẹ̀n ẹ́gà nẹ yá àyẹ: ọgbọ̀na ègbeka È dín ẹ̀kẹ̀na wó ororo ibè na.